開箱
Arlo 而呢個牌子大家可能覺得陌生，但其實佢係 Netgear 分拆出黎，後者係大型 ROUTER 品牌，一貫以非中國製造產品線見稱。同時，Arlo 分拆後亦係紐約上市公司黎。 所以，論公司技術背景、產品安全可靠度，你仲需要攞佢同市面上其他產品比較嗎？ 今次同大家開箱實測的係最新香港有行貨的「撳鐘仔」Arlo Essential 無線視像門鈴，香港個賣價係 1788 元，包括 3 個月 Arlo Smart 雲端服務試用期，以及 30 日雲端儲存錄影服務。 留意翻，過晒試用期時候，就係要課金比月費延續服務喇。
▲ 盒身已經列出所有可以做到的功能。
▲ Essential 可以配合到乜野服務，盒身都清楚列出。
▲ 門鈴黎講，佢有夜視、有 Video Call、又係輕度防雨。
▲ 最重要係同你講清楚，呢件 Essential 最大比例都係印尼生產，而後續處理工作就係翻中國；宜家好少有廠商會咁清楚、咁大聲話比客戶聽，自己產品係邊度生產，邊度包裝。
▲ 真身登場！ 仲有一層保護膜包住，往往呢類細節就可以睇得出廠家是否用心。
▲ 每個配件都安置妥當，盒內的說明書亦會講清楚比你聽到底會包括乜野配件，確保你有收齊堆配件。
▲ 逐個配件同大家介紹：左邊係專用充電池，中間是開蓋針，右邊自然是 microusb 充電線。
▲ 黎電池係官方跟機比，但只有一粒；而我建議如果大家有預算，可以考慮入多一粒做後備。 點解呢？
▲ 電池擁有超大 6500mAh 電量，但所以充電輸入都需要一定的時間； 呢個亦都係點解我會建議大家有得買多粒電就要買。 一粒無電就直接用另一粒頂上，然後無電果個慢慢充，咁個 Door Bell 就可以無間斷咁保持工作模式，保護你屋企喇！
▲ 充電位置相當唔隱蔽，隱藏在膠塞保護住的閃電符號下。
▲ 需要用力撥開才可以見到 microusb 充電接口。
▲ 就係咁直接插落去充電，紅色自然未滿，綠色就完成充電，用 5V/2A 火牛實測大約充電 3 小時以上；官方宣稱充滿電一次可以持續 3 - 6 個月。
▲ 破膜之後真身如上，上門係大眼仔，下面圓圈是門鈴按鈕。
▲ 接近半球體的鏡頭能夠提供 180 度視野，提供解像度達到 1536 X 1536 的 1:1 比例影片；亦支持 HDR 應對高光差場景。
▲ 機身背部就係咁樣，就係會有一個大大窿係度；如果豪宅、村屋用戶安裝的話，咁咪會漏水？ 嘻嘻。
▲ 打開背蓋是需要用到類似手機的卡針，而 Arlo 配送這個比較粗，用力會更好輕鬆。
▲ 開蓋之後就會見到如圖的情況，右邊背蓋會見到接線位，係可以將無線門鈴變成有線門鈴，咁就唔需要換電喇。
▲ 呢個 IP65 我無法從官網確認到係咪屬於防水規格（我估計有機會唔係），但官網有明確表示「專為承受高溫、寒冷、雨水或陽光而設計」；而且再一次見到「印尼產品」、「中國後續加工」的英文標識。
▲ 香港行貨都係有跟呢個「增加斜角」蓋，加落去就可以將個背同牆身形成一定側視角度，特別適合香港房屋單位多角度的走廊空間。
▲ 需要留意，如果想將無線變成有線，需要自行根據說明書教學配置適當的火牛配件。
▲ 接線器竟然都配埋比我（但我用不著）； 入牆螺絲套件自然齊全。
▲ 準備好晒就自然要睇說明書，DOWN APP 進行初始設定。
軟件設定
Arlo Essential 無線視像門鈴係需要配合智能手機先用得到的，而相關 Apps 可以係 Play Store 和 App Store 免費下載得到。 設定的過程不算簡單，但亦不算複雜，只係有幾個 TIPS 位會係下面醒比大家，減低各位撞板的機率。
▲ 上門係正確的 Apps，唔好 DOWN 錯呀；而首次用 App 係需要進行註冊啟動。
▲ 由於 Arlo Essential 都算係一種保安產品，所以我係強烈建議大家啟動「兩階段認證」，而如果你部手機擁有足夠的加密習慣，就可以好似我咁「信任」此裝置。
▲ 根據產品類別選擇 Essential 無線視訊門鈴就可以了。
▲ 個 App 仲會相當貼心、煩厭地係咁提醒你，到底會有乜野配件係盒裡面。
▲ 請按照指示準備工具，以及幫電池充滿電。
網絡有指定要求
▲ 安裝過程會分為：無線設定、鑽牆安裝兩個過程；後者其實大家可以自己 FF 用鑽牆或其他方法固定好你個 Essential Doorbell；無線設定就要留心，必須用 2.4GHz 的 WiFi 網絡！ 意味住如果好似本 YK 屋企咁一早淘汰左 2.4GHz 網絡的用戶，就需要再開翻 2.4GHz 制式，或者自己另外追加一個單獨用的 ROUTER 先能夠成個用得到佢。
▲ 配對好之後，再有一輪簡單的教學，就正式進入操作界面了，大家見到上門個畫面，相當亮麗和清晰。
▲ 我呢度必須提醒大家，你單買機體係會送 3 個月試用服務，係試用期完結之後就需要課金買服務；最平的方案係 24 蚊一個月，包括 2K 像素錄影，動態偵測，以及最高保留 30 天的雲端影片記錄。 如果你唔課金，就會得翻動態提示（無記錄無影片睇）、以及 LIVE 直播門外情況。 所以，我係強烈建議大家如果需要買呢類 Doorbell，強烈考慮課金比值得你信賴的供應商，訂閱埋個雲端服務，一整套用落去會爽好多！
▲ 大家可以見到屋主門外是一個小 L 型走廊，防火門可能會有人出黎，而走廊就梗係都會有人走動； 而 Arlo Essential 支持區域動作警示，意味住如果係該區域裡面有「移動」發生，就會提示你，好似右圖咁，就發現左我三次的移動記錄，手機亦發出提示通知，而且會錄晒係雲端比我隨時翻開。
▲ 如果有人「撳鐘仔」，身為一個稱職的 Doorbell 就會好似 Essential 咁打電話比你，然後你就可以係手機見到係乜水「撳鐘仔」，然後決定係咪要出黎應門；如果你發現係速遞員的話，就可以選擇按下語音回覆，Essential Doorbell 就會自動用英文讀出「Leave the package outside」，意思係叫對方「放下屠刀轉身離開」。
▲ 再提醒多一次各位準用戶，Arlo 無線視像門鈴 Essential 如果唔訂閱雲端服務，就會無左最好用的雲端錄影功能架啦！ 仲有千奇唔好學我咁多手取消左個試用，取消左就無得翻轉頭了。
結論
無線智能門鈴類的產品市場上競爭對手繁多，絕大部分都係中國品牌，擁有價格上的優勢，而來自美國 Arlo 無線視像門鈴 Essential 就顯得別樹一格，特別係背後的雲端系統能夠讓本 YK 安心又放心。 我相信不少網友都會問以下呢個問題：到底千幾蚊一個智能門鈴，仲要另外比月費先有爽歪歪的額外功能，值唔值呢？ 我從來都唔會問呢個問題，因為我屋企根本唔會有乜訪客......
但上面肯拍爛檔幫手借出蝸居比我 + 陪我一齊做測試的朋友就大讚特讚 Essential 視像門鈴，佢話自己會成日遇到以下的幾個情況：
1）當係廁所紮馬聽到有人「叮噹門鈴」，呢個時候只需要透過 Doorbell 見到原來係送 Amazon 包裹；用埋個 App 講句「放低包裹你就可以走人了」，成件事輕鬆又簡單。
2）同隔離屋鄰舍關係「特別好」，想知道有乜人係日頭返工時候過黎「撳鐘仔」；
3）屋企有女人單獨留在家中，咁門口有乜動靜都可以透過 App 見到相關的記錄，絕對係一個可靠的保安措施。
4）冬天係床度唔想專登起身行出去門口睇邊個搵佢。
所以，如果你好似我朋友咁經常客似雲來，咁 Arlo Essential 會係你最佳拍檔； 但如果你好似我咁屋企個門鐘都生晒鏽，咁就...... 算了......