平過格價網！蘇寧門市大清貨 SHURE 耳機 / AirPods Max 低至 37 折賣

左定坤 (Cho Ting Kwan) 2022-03-16 20:41 | 數碼影音

唔少網友喺購買電子產品之前，都會先去香港某大型格價網，睇下邊度買平啲，但有些時候，格價網未必一定係最平，因為有時大舖啲清貨優惠，分分鐘仲平過格價網。而最近就留意到，有蘇寧店舖將一系列耳機清貨，低至 37 折賣，仲要係全新。想知有咩筍貨，睇下文啦！

行過大埔新開咗一段時間嘅蘇寧，留意到有一些產品平價清貨。而我認為最抵玩嘅，應該係 SHURE SE846 隔音入耳式耳機，原價 $8100，減至 $3930，即係減咗 $4170。比較返格價網嘅報價，都起碼要 $4700 至 $5000 不等。而事實上，蘇寧上年 12 月嘅時候，都有搞過網店特賣場，當時都有將呢款耳機清貨，嗰陣嘅賣價係 $4370，可能嗰陣清唔哂，或者某啲門市仲有貨，所以而家再平多幾百啦！你又會唔會考慮？

除咗 SHURE SE846 隔音入耳式耳機，B&O Play E6 入耳式無線耳機同埋 Apple AirPods Max 都有清貨，前者由原價 $2698 減至 $999，計起上來即大約 37 折，格價網報價約 $1100 至 $1200；而後者則其實唔算十分平，由原價 $4599 減至 $3888。