Dyson Ontrac 開箱看外觀
版主本身係「木耳」，對音樂識得欣賞，但又唔係真係可以好專業咁描繪到，到底音質係好定唔好，始終我會覺得，就音樂而言，每個人耳道結構都不一樣，同一段音樂畀唔同人聽，感覺可以有唔同，同一對耳機畀唔同人聽，亦都一樣。簡單嚟講，聽覺呢樣東西係好主觀，我覺得好就係好，我覺得唔好，就係唔好。當然，其實唔止聽覺，視覺都係好主觀，我鍾意呢個設計，但你亦可以話你唔鍾意，鍾意其他設計，並無衝突。而講到 Dyson Ontrac 降噪耳機，我就非常鍾意佢個設計，感覺高級之餘又唔會覺得好浮誇，特別之處在於耳墊可以更換，可以自己打造屬於自己個人風格嘅頭戴耳機，而且佢高密度嘅海綿耳墊相當柔軟，並且符合人體工學設計，令到就算長時間佩戴，都可以保持舒適，不過喺而家咁熱嘅天氣下，長時間佩戴都係會熱囉。
設計外觀好唔好睇就見仁見智，好主觀，所以都唔講咁多，直接睇相睇開箱最實際：
Dyson Ontrac 體驗評價
Dyson Ontrac 降噪耳機機身同樣有一系列的控制選項，而且本身仲內置感應器，當你摘下耳機就會自動暫停，戴起耳機就會重新播放，喺左右耳罩輕點兩下，就可以快速切換主動降噪或者通透模式，不過事實上其實喺機身任何位置拍兩下，唔一定耳罩位置，都一樣可以做到快速切換，而右耳罩亦可以控制音樂播放、音量調節等功能。至於音質方面，其實喺旺角西洋菜街百老滙舉行嘅體驗日，嗰陣已經初步戴過體驗，不過唔知係當日環境太嘈，音源嘅問題，定軟件嘅問題，嗰陣職員連接佢嘅手機播放 Spotify 串流音樂，就算開到最大聲我都覺得好細聲。但而家借測到手嘅耳機，就覺得音量並無大問題，我本身都好少聽開好高質無損音樂，所以我一般都係戴住嚟聽下 YouTube Music 或者 Spotify，大約開到 7 成左右音量，已經可以喺條街度聽得好清楚。
不過，清楚還清楚，即使我係木耳但都覺得未夠「過癮」，高低音對比並不明顯，層次唔夠分明，會有少少感覺 flat 咗，爭咁少少令我好似喺現場聽歌嗰種澎湃感。但無可否認嘅係，佢嘅降噪效果真係幾出眾，可以阻隔到大部分環境嘅嘈雜音，平時搭飛機用，都一樣可以畀到你平靜嘅私人空間，呢點係值得一讚。
