港行開箱：外型靚爆、質感最高！
網友們可以搜尋本站 ePriceHK 內的 Chromebook 開箱，曾經有 ASUS Flip C213 和 ASUS C523，可惜都係高風險「森林水貨」。呢次同大家分享的 ASUS Chromebook Flip C434（下稱 C434）在數月前曝光，機身用鋁合金質材打造，通過軍規級 MIL-STD-810G 耐用及穩定測試 ，配合超窄邊框 14 吋觸控屏幕（達到 87% 高屏佔比），加上長達 10 小時續航力，發布當日已令本 YK 期待萬分。
▲ 箱呀箱，本 YK 等左你好 Q 耐喇～
▲ 真名叫做 C434T，可能係 TOUCH 咁解；貼紙都簡單列出呢部機的部分規格。
▲ 盒內包裝簡單，白色套內正是 C434 安靜躺著。
▲ 盒內配件不多，簡單的使用指引 + 保養說明，以及英規 USB-C 火牛。
▲ 原裝的 USB-C 火牛支持 20V/2.25A、15V/3A、9V/3A、5V/3A 四種充電模式。
外觀欣賞
▲ 好耐無見過令人咁興奮的外殼質感：「白銀聖衣」亮眼奪目，摸落去磨砂金屬的舒適感，加上來回摩擦「沙沙聲」的治愈力，真係令 me 摸不停手。
▲ 鏡面「ASUS」標誌，在磨砂面蓋上尤其突出。
▲ 雷雕 「 菊花 chrome」的圖樣字眼，一睇就知道有 ChromeOS 加持～
▲ 內置 48WHr 的 3-cell 鋰電池，底蓋四角都有防滑膠 + 左右雙喇叭，並無額外的散熱開孔。
▲ 呢對喇叭聲大唔拆，適合聽歌睇片用途。根據我的體驗和經驗，C434 在這方面確實完全吊打一切中低階對手。
▲ 機身左側分別有 USB-C 充電口（支持 Power Delivery PD 充電）、充電燈、USB 3.1 接口、3.5mm 耳機孔、音量鍵和電源鍵（按鍵上面係有燈）。
▲ 來到右側，有 USB-C 接口和 microSD SDXC讀卡器；其實兩個 USB-C 皆可以充電以及支持屏幕輸出。
▲ 機身的後方，可以看到光亮的金屬鉸位， C434 支持 360 度 Flip 屏幕翻轉功能。
▲ 鉸位造工相當不錯，開合開合緊緻依然，但如此一來 C434 就無法做到單手開芒。
設計佈局
▲ 擁有 14 吋 1920 X 1080 解像度 IPS 屏幕（係無 AIR GAP 架！），依達到 100% sRGB 及寬達 178 度可視角度，同時支持多點觸控，在 Chromebook 世界裡面可算係中高階的屏幕了。
▲ 屬於標準的 Chromebook 鍵盤格局，頂排是各項 ChromeOS 功能鍵，左邊的搜尋鍵可以修改為 CAP LOCK；在 ChromeOS 中有很多組合鍵，例如 DEL 鍵等於 ALT + Backspace，而 C434 擁有左右 CTRL、ALT 和 SHIFT，所以輸入快捷組合鍵會很方便。
▲ 觸控板對比八達通，雖然無超大面積觸控板，但 C434 的觸控板，個人認為只是僅次於「皮野級」 旗艦 Google Pixelbook 觸控板； 掃動順滑，左右撥亦流暢，更重要係按壓下去反饋實在，如此高品質觸控板在 Chromebook 裡屬少見。
▲ 本 YK 認為 C434 的鍵盤在眾多 Chromebook 中亦屬頂級，具備 1.4mm 鍵程的鍵盤，令打字不會有一種脆弱的空虛感；平價 Chromebook 我放心打落去係因為打爛唔心痛，而 C434 我放心打落去係因為打到底有一種實在和穩定。補充一點，C434 鍵盤係有 LED 背光，亮度大致分為 4 級，透過 ALT + 屏幕亮度加減鍵進行調整。
▲ 四邊 NanoEdge 邊框確實窄，跟 Macbook Pro 13 吋型號同樣的外殼面積，但可以塞進去 14 吋的屏幕，而且係觸控屏幕！當本 YK 打開屏幕見到個芒，確實是有過一秒的感動。
▲ 屏幕頂部保留了一個 HD 鏡頭。
▲ 但要注意的是 C434 屏幕外殼做得薄：如果要觸控屏幕，我建議用另一隻手扶住，或者變身做平板模式。因為試玩時發現，篤篤篤個芒會前後搖晃。
▲ 還有一個不得不提的優點，ASUS 把這叫做「ErgoLift 軸承設計」，翻開屏幕時鍵盤會自動構成傾斜角度。唔好睇小呢個設計，有助鍵盤卸力消力，手指承受的反作用力會無咁明顯，就好似 Surface Pro 平板的鍵盤套設計一樣，會有更舒服的打字體驗。
360 度 Flip 變身平板
▲ 你睇型號名都知道，ASUS Chromebook Flip C434，姐係可以反轉變身。
▲ 反轉後實體鍵盤自然會失效，只能使用屏幕上的虛擬鍵盤。
▲ 翻過來變身平板模式後，機身邊沿位置稍微翹起，雖然外觀唔太好睇，但可以防止夾到手指。（我以前試過，估大家都唔會想試）
▲ 重量達 1.45 公斤的平板，有打籃球習慣的本 YK 都可以單手 Hold 得住！ （但其實我右手先係主力手～）
豪華規格：效能又如何？
其實每次版主要本 YK 介紹下 Chromebook 的效能，me 真係唔知點講。因為 ChromeOS 最大優點係輕巧，對硬件需求低，一般嬰兒級處理器如 Celeron 都可以行得順，裝 Android App 或者玩 Linux 應用都無乜難度。因此，我手上的 C434 可說是「豪華規格」：採用 2018 年第三季才發布的 Intel Core m3-8100Y 雙核心處理器，8GB LPDDR3 RAM + 64GB eMMC 儲存空間，就咁睇部 C434 用起上黎可能會飛。
▲ 雙核心四線程的 Core m3 處理器，對於 ChromeOS 實在大材小用，而 8GB RAM 多到可能要開好多個 Android Apps 先會爆滿，嘿嘿。
▲ 屏幕原生係 1920 X 1080 解像度，但你如果視力超人，可以谷上 2194 X 1234 睇睇。
▲ 安兔兔跑唔到，唯有跑 Geekbench Android 版：單核心分數超越 S855 旗艦處理器喇！ 但唔好忘記，Intel 處理器係 x86 架構，跑 Android 分其實姐係讓緊半臂。
▲ 配備 eMMC 的 ROM 預計速度都唔會太快，而 Androbench 結果符合預期。 C434 在實際使用中唔覺得慢，更多的感覺是順和流暢！ 真心要唱翻首「谷歌美」，無你就無 ChromeOS～
▲ 今次都照樣為 C434 做串流播放測試：根據 Intel 官方文件，m3-8100Y 支持 4K 解碼。在 Youtube 4K 串流測試中，亦毫無壓力、一格不跌。
▲ 貪心少少玩埋 8K 可以嗎？ 答案係不可以，Frames 跌到一地都係。
▲ 本 YK 最後想了一個辦法給大家做一個簡單展示： 打開好多個 Chrome 分頁，全部都係 Youtube 播歌，而網友自己係屋企都可以一齊做呢個實驗。
▲ 細心留意網頁開啟的速度、背景載入的速度以及切換分頁之間的流暢度，根本感覺唔到有明顯的遲滯，實在驚人！
總結：高質 Chromebook、行貨保養係重點！
同大家開箱試玩 C434 連自己都覺得開心。ASUS Chromebook Flip C434 絕對有實力躋身頂級 Chromebook 之列：出色的鋁合金工藝、NanoEdge 窄邊框屏幕和「好打得」的鍵盤，比其他對手具備明顯的優勢。
睇到 ASUS HK 官方主打 C434 作校園用途，的確能滿足一般大學生做功課需求：使用 Google Doc 或 Microsoft Office Online 皆輕而易舉，做 Research 都係用瀏覽器、上 Online Database 之類。而本 YK 個人認為 C434 更加係流動辦公利器，高質感造工見客都唔失禮，而且流暢的運行速度絕對係其他同價位電腦比唔到你。
收工後切換到另一個賬號就可以開始聽歌睇戲碌 FB，認真爽歪歪。而 C434 行貨定價 5798 元起，參考翻外國定價以及考慮埋行貨有 2 年國際保養服務的優勢，C434 的速度、續航、工藝值得有要求的用家考慮。
更多詳情：官網購買 ASUS Chromebook Flip C434