大家都知，版主我在各大舖，或多或少都會有些相熟朋友，有時有啲乜想知、想了解，我隨時都可以一個 WhatsApp 去請教一下。最近我就向其中一位豐澤朋友問，而家豐澤買 Apple 產品，係咪一樣照係無得做免息分期？
呢位朋友仔就咁答：係呀，除咗 MacBook 同 iMac 之外，其他 Apple 產品都係要 5% 手續費。然而，過咗無耐呢位朋友就話，更新咗，只有 iMac 先唔使手續費，即係以前買 MacBook 係可以做免息分期，而家就唔得了，除非你買 iMac。呢個措施更新咗幾耐，我無從考究，不過我淨係知，而家如果想去豐澤買 MacBook 但無得用信用卡分期，對於唔捨得一炮過畀錢買 MacBook 嘅窮版主嚟講，會係一個壞消息。
不過，真係想喺大舖免息分期買 Apple 產品，係咪真係無方法？唔係。繼續留意 ePrice，我哋之後會有另一文章教你點樣做到免息分期。