HONOR MagicBook Art 14 開箱看外觀
HONOR 首次喺香港推出咗手提電腦 MagicBook Art 14，呢部手提電腦集輕薄設計、護眼功能、影音體驗以及高效強 AI 功能於一身，將藝術美學融入科學設計中，而呢部手提電腦最突出嘅賣點，在於佢個鏡頭，因為佢係首創磁吸式鏡頭，而且仲可以收埋，又唔會容易唔見，確實係相當特別且出眾。HONOR MagicBook Art 14 首次採用 HONOR 魯班架構，透過榫卯式設計、異構電池和蟬翼超薄 VC，令機身重量減低 19%，並採用鎂合金機身、鈦合金鍵盤以及金剛鋁風扇等航天級超輕物料，為機身減重 30%，厚度約 1cm，輕至 1.03kg。而屏幕方面，MagicBook Art 14 採用咗 14.6 吋 3.1K OLED 觸控屏幕，屏幕比例為 3:2，得益於可以收埋 + 可以翻轉嘅鏡頭，除咗可以提高隱私安全，仲可以令屏佔比高達 97%。而色彩方面，更具備原生 10.7 億色、100% sRGB 色域以及 100% DCI-P3 色域，在陽光下最高亮度高達 700nits，
另外，MagicBook Art 14 亦具有一系列護眼功能，包括採用 4320Hz 超高頻 PWM 零風險調光以及 HONOR 綠洲護眼技術，並通過 VICO A+ 級護眼認證、國家眼科工程中心護眼測試、TUV Rheiland 無閃屏認證以及 TUV Rheiland 硬件低藍光認證，並支援電子書模式，長時間工作或閱讀都可以降低雙眼負擔。
▲ 收到部機，有個啡色紙皮箱，上面寫住 HONOR MagicBook Art 14。
▲ 拎出嚟之後，入面有兩盒嘢，一盒係部 MagicBook Art 14，而另一盒火牛 + 充電線。
▲ 香港賣嘅係橄欖綠色，咁我當然都會上手返呢隻顏色啦！
▲ 因為我一拎部電腦出嚟，完全無電狀態，所以求其拎隻尿袋頂住先，佢支持 65W 輸入，而咁啱我手上呢隻 Belkin 尿袋可以叉到電腦，就用住嚟叉住先。
▲ 右上方具有支持指紋辨識嘅電源鍵。
▲ 鍵盤上方位置，有 HONOR 嘅字樣。
▲ 鍵盤手感符合我手形，就算我手好細隻，都依然可以輕鬆啪啪啪...... 咁打字。
▲ 右方會有 USB-A 插槽、HDMI 插槽以及 3.5mm 耳機孔，喺一部咁薄嘅手提電腦入面，有咁齊 ports 都算係難得，最近版主用緊華為嘅 MateBook X Pro，既無 USB-A 又無 HDMI 又無 3.5mm 耳機孔，只有 3 個 USB-C，咁呢部 MagicBook Art 14 呢點都係佢嘅優點嚟嘅。
▲ 左側會有兩個 USB-C 插槽，以及鏡頭嘅收納倉。
▲ 可以撳一下將鏡頭彈出。
▲ 而屏幕頂部會有 5 點式磁吸。
▲ 可以將鏡頭放到磁吸點上。
▲ 正面放自拍又得。
▲ 反面放，影到對面，都得。
HONOR MagicBook Art 14 各項性能測試
規格一覽
性能方面，HONOR MagicBook Art 14 配備咗 Intel Core Ultra 5 處理器 125H，喺平台級 AI 同埋 OS Turbo 3.0 技術加持下，以智能感知使用場景，實現對底層資源嘅全面精細化調度，喺性能釋放以及持久續航中達致最佳平衡。而 HONOR MagicBook Art 14 亦喺 AI 能力進一步提升，在會議場景中，支持 AI 雙向降噪、隱私投屏等實用功能；在辦公場景中，Magic AI 工作平台提供全局收藏、智能互聯等功能，文件可以喺 HONOR 手機、平板、電腦之間跨設備傳輸，提升工作效率。
MagicBook Art 14 亦支持長時間運行多個大型文檔、辦公軟件或者視頻會議等高負載重度辦公場景，續航能力達到 6.2 小時。
▲ 可以見到用嘅係 Intel Core Ultra 5 125H 處理器，具有 4 個 P-Core 強效能核心 + 8 個 E-Core 節能核心 + 2 個低功耗高效核心，一共 18 線程。
▲ 主板製造商係 HONOR 自己。
▲ 支持 DDR5 記憶體制式。
▲ 顯示卡為 Intel Arc Graphics。
開機速度
▲ 開機需要 20 秒完成啟動，27 秒載入所有程序，時間稍嫌偏長一點，要大約 47 秒先可以完成所有過程。
綜合性能
▲ NovaBench 初步性能測試顯示總分為 1814 分，其中 CPU 成績為 1099 分，而 GPU 成績則為 139 分，比較以前我哋測試過嘅三星 Galaxy Book 3 Pro，Honor MagicBook Art 14 喺 GPU 以及記憶體嘅成績相對更高分一點。
SSD 測試
▲ 採用咗 1TB 固態硬碟。
▲ 連續讀寫速度分別為 3786.971mB/s 以及 2873.331mB/s，而多工隨機讀寫速度則為 1283.892 mB/s 以及 1808.402 mB/s。
GPU 處理器性能
▲ Basemark GPU 標準測試嘅 4K Vulkan 1.0 測試中，成績為 1428 分，僅比三星 Galaxy Book 3 Pro 嘅 1529 略低一點。
▲ 而 Basemark GPU 標準測試中嘅 OpenGL 4.5 以及 DirectX 12 測試中分別成績為 1075 分以及 1159 分，呢兩項就比較明顯同 Galaxy Book 3 Pro 有差距，意味着喺 PS 改圖、輕量剪片等圖像處理工作，會相對較弱。不過都好合理，本來呢兩部電腦就唔同定位。